गोलन्जोरको रानीखोला नयाँ गाउँमा घरघरमा खानेपानी, ५४ घरधुरी लाभान्वित,

२०८३ कार्तिक १९ गते, बिहीबार

सिन्धुली ।
‎ सिन्धुलीको गोलन्जोर गाउँपालिका–४ स्थित रानीखोला नयाँ गाउँमा खानेपानीको समस्या समाधान गर्ने उद्देश्यले निर्माण गरिएको खानेपानी आयोजनाको आज (बिहीबार) उद्घाटन गरिएको हाे । आयोजना सञ्चालनमा आएसँगै गाउँका ५४ घरधुरीमा घरघरमै खानेपानीको सुविधा पुगेको छ।
‎
‎गोलन्जोर गाउँपालिकाको ‘एक घर, एक धारा’ अभियानअन्तर्गत गाउँपालिका र ब्याक टु लाइफको सहयोगमा आयोजना निर्माण गरिएको हो। कुल ६५ लाख ५ हजार ७ सय ५९ रुपैयाँ लागतमा सम्पन्योजनाको गाउँपालिका अध्यक्ष शंकरराज बराल र उपाध्यक्ष ज्वाला प्रसाद न्यौपाने (पुकार) ले संयुक्त रूपमा उद्घाटन गर्नुभएको हो।
‎
‎गाउँपालिकाका अनुसार आयोजनाअन्तर्गत ६० घनमिटर क्षमताको एउटा आरभिटी, एउटा इन्टेक तथा ९ किलोमिटर पाइपलाइन निर्माण गरी घरघरमा खानेपानी पुर्‍याइएको छ। आयोजनाबाट रानीखोला नयाँ गाउँका ५४ घरपरिवार प्रत्यक्ष लाभान्वित भएका छन्।
‎
‎उद्घाटन कार्यक्रममा अध्यक्ष  शंकरराज बराल र उपाध्यक्ष  ज्वाला प्रसाद न्यौपाने (पुकार) ले नागरिकका आधारभूत आवश्यकता पूरा गर्नु स्थानीय सरकारको प्राथमिकतामा रहेको बताउनुभयो। उहाँहरूले खानेपानीसँगै शिक्षा, स्वास्थ्यलगायतका क्षेत्रको विकास र नागरिकलाई आवश्यक सेवा सुविधा उपलब्ध गराउन गाउँपालिका निरन्तर प्रतिबद्ध रहेको धारणा व्यक्त गर्नुभयो।
‎
‎खानेपानी आयोजना उद्घाटन कार्यक्रममा गोलन्जोर गाउँपालिका–३ का वडाध्यक्ष केपी पोखरेललगायत जनप्रतिनिधि, स्थानीय बासिन्दा तथा सरोकारवालाहरूको उपस्थिति रहेको थियो।
‎
‎आयोजना सञ्चालनमा आएपछि स्थानीयवासीलाई खानेपानीको जोहो गर्न टाढा जानुपर्ने बाध्यता कम हुनुका साथै दैनिक उपभोगका लागि सहज हुने अपेक्षा गरिएको छ।

सम्बन्धित खबर

2026 Copyrights Reserved @ Dristicon