रामेछाप ।
मन्थली नगरपालिकाले कात्तिक १६ देखि २८ गतेसम्म सबै १४ वडामा वडा–स्तरीय प्रारम्भिक बालविकास समिति गठन गर्दै एकदिने अभिमुखीकरण कार्यशाला सम्पन्न गरेको छ।

२०७७ मा राष्ट्रिय योजना आयोगले तयार पारेको र मन्त्रिपरिषद्ले स्वीकृत प्रारम्भिक बालविकास राष्ट्रिय रणनीतिअनुसार वडा अध्यक्षको नेतृत्वमा न्यूनतम नौ सदस्यीय समिति गठन गरिएको थियोे ।

गर्भावस्थादेखि आठ वर्षसम्मका बालबालिकालाई स्वास्थ्य, पोषण, सुरक्षा, शिक्षा र सरसफाइका एकीकृत सेवा उपलब्ध गराई उनीहरूको अधिकार सुनिश्चित गर्ने उद्देश्यले यो संरचना बनाइएको हो।

दिगो विकासका १७ मध्ये ११ लक्ष्य बालविकाससँग सम्बन्धित
आधारभूत अवधारणा, उद्देश्य, तत्व, महत्व र समितिको दायित्वबारे अभिमुखीकरण गरिएको थियो। वडा अध्यक्ष, सदस्य, विभिन्न शाखाका कर्मचारी, महिला स्वास्थ्य स्वयंसेविका, वडा नागरिक समूहका संयोजक तथा बालसञ्जाल प्रतिनिधिको सहभागिता रहेको कार्यशाला इसिडी हार्मोनी परियोजनाअन्तर्गत आयोजित थियो ।

परियोजनामा चाइल्डएड नेटवर्क फाउन्डेशनको आर्थिक तथा सेतो गुराँस राष्ट्रिय बालविकास सेवाको प्राविधिक सहयोग रहेको छ। केन्द्रहरूलाई कार्पेट, चकटी, कुर्सी, किडबक्स, सिकाइ र्याकलगायत भित्री सामग्री र पिङ, चिप्लेटी, क्लाइम्बर, चाकाचुली जस्ता खेल सामग्री वितरण गरिएको छ। साथै, अभिभावक शिक्षा, शिक्षक तालिम तथा विद्यालय घेराबारजस्ता कामसँगै १४ वडाका केन्द्रका लागि १० इसिडी मेन्टरमार्फत निरन्तर प्राविधिक सहयोग प्रदान गरिएको छ।